Añadir nuevo comentario

Taytaykuna, mamaykuna,

Taytaykuna, mamaykuna, napaykuykichikmi llapantiykichiktapas. ¿Allinllachu, llama llapanchu? Arí chakra llamk'aq runapas, uywa michiq runapas achkam kayku, ichaqa. chay llamk'aq runakunaqa kay Perú Mama Llaqtap kamachiqninkuna akllanallapaqmi yupasqa kayku; chay qhipamanqa qunqasqam kapuyku. Tapurikusaq, ¿pitaq sapa p'unchaw mikhusqayki papatapas, aychatapas puquchimun? Chay llamk'aqkunapaqri, ¿imatataq akllachikuqkuna munachikamuchkan? Manam imatapas munachikamunkuchu; paykunaqa "wawqíy, panáy, ñuqata kamachikuqpaq akllaway, ñuqam sueldota yapamusaq, ñuqam unuta wasiykiman chayachimusaq, ñuqam wayk'ukuna gasta yaqa qasilla chayachimusqayki, kayta, chaytam qampaq rurarqusaq, ..." nispa imaymanata munachikamuchkanku. Chayri, kamachikuqña yaykurquspataq upyananchik unutapas qichuwaspanchik aqu pampakuna qarpanapaq wak llaqtakunamanraq aparqapunku. Qarpanapaq kaptinqa allinmi kanmanpas; ichaqa, ¿pipaqtaq chay allpakunari qarpakunqa? Chay qarpasqa allpakunataqa hatun qhapaqkunamanmi rakirparinku, ¿icha ñuqanchikpaq kanchu huk wachu papa chakrallapaqpas? Ñuqanchikqa ch'aki qhatakunapi, mana unuyuq pampakunapi imallatapas tarpukunchik; chaytataq para unullawan imallatapas wiñachikunchik; ruruchisqanchiktataq llaqtakunaman runap mikhunanpaq apanchik. Chay qhapaqkunap ruruchisqanri, ¿maymantaq rin? Chaykunataqa karu hawa llaqtakunaman apanku. Chayri, ¿pitataq kamachikuqpaq akllakusunchik? Llaqta masiykuna, chay munachikuqkunataqa tapurisunchiktaq ari: Qamri taytáy, qamri mamáy, ¿imatataq wakcha chakra llamk'aqkunapaq, uywa michiqkunapaq ruranki? nispallapas tapurisunchik.
Allinlla llapantiykichikpas, huk p'unchawkamaña.

Entrevista

Ciencia